Home « Auxlang Articles «
LI ACTUAL INTERLINGUISTIC SITUATION
LI ACTUAL INTERLINGUISTIC SITUATION
De Novembre 1949
Li bombardamentes e mortationes del grande guerre, con li acompaniant famine e misere moral, ha stoppat omne activitá interlinguistic in multe landes. Li majorité es preocupat per reconstructer lor domes demolit e li base material de lor vive.
Ma tra li ruines, tra li nubes de terrore e morte, on ja vide li interlinguistica recristallisar se in quar gruppes rivalisant: Esperantistes, conservativ Idistes, partisanes de lingues natural simplificat, e li progressiv naturalistic movementes.
Li Esperanto-movement posse oposir a su concurrentes un numbere solid de fanatic adherentes a su tradition: devoet, self-sacrificant propaganda e un interne organisation disciplinat. Su ductores considera que li max eficace metode de combatter rivales es tacer; dunc in Espo-revues ordinarimen reye tabu e censura, e si, exceptionalmen, altres es mentionat, it es con li mecanic refren: ili es pocos, e noi Esperantistes conta "milliones"!
Li Ido-movement ha cessat expander se e limita se a defender li aquisitet positiones. Li majorité del activ Idistes ha transit a Interlingue; con li restant conservatores noi exchangea polemicas plutost sportiv quam util: fanaticos on ne posse convicter; ili deve, inregretatmen, morir con lor crede.
Li partisanes del simplificat latin sufre quasi li sam fate quam li Idistes. E li propagation de lingues national simplificat posse esser considerat apen quam altrecos quam un variante del aspiration internationalisar un lingue national complet. Nationalistic jalusie despermisset li adoption de un sol lingue national per liber consentiment, e noi ne vide pro quo ili vell capitular avan Basic English.
Dunc li quar frontes practicmen resolue se in du: Esperanto contra natualistes, e li naturalistic campe contene (pos li morte de Novial, movement e autor) solmen Interlingue e IALA.
Noi interlinguistes save que li fanatic Esperantistes es un grande dangere por li successe del L.I. in un forme moderne e natural. Tamen lor propaganda vell frappar in vacuitá, si li naturalistic scole clarmen comprende su tache real: assecurar que omne hom cultivat, omne person competent save que Interlingue existe e es melior. Ultra to it es necessi efortiar ganiar progressiv Esperantistes por nos per adressa les psichologicmen redactet informationes pri Interlingue.
Che nos, in Tchecoslovacia, li max activ interlinguistes ha venit de Esperanto e Ido. Por ganiar les on besona corage e patientie, ma li resultates es bon.
Nor triesim tache es mortar li sol esperantistic argument: que noi es poc. Lu bon ne vice per se self, ma per li dur efortie del bonos. Si noi ne vole glissar in li tragic paradoxse que tis quel defende un cause sin espera es activ e devoet, e tis quel defende visibil progresse practicmen stagna, alor multe realistic labor atende nos.
J. Karen (Tchecoslovacia)
